Plantun de Prouvènço

Pèr coumpara dos planto d'encò nostre

Trigonella esculenta & Scleranthus annuus

Jauneto

Trigonella esculenta

Fabaceae Leguminosae

Autre noum : Jauneto(-manjadisso).

Noms en français : Trigonelle comestible, Trigonelle à petites cornes.

Descripcioun :
Aquesto jauneto pòu èstre proun coumuno dins d'ùni relarg de Prouvènço. Es uno planto de l'an que se recounèis à si enflourejado jauno de 8 à 25 flour pourtado pèr un pecou pulèu long. Si dòusso peréu soun eisa de recounèisse, soun torso de 10 à 16 mm.

Usanço :
Li grano soun manjadisso, mai avèn pas d'entresigne sus de biais de la manja au nostre. Escriéure au site se n'en sabès mai.

Port : Erbo
Taio : 10 à 60 cm
Fueio : coumpausado
Tipe bioulougico : Teroufite
Cicle bioulougico : Planto de l'an

Gènre : Trigonella
Famiho : Fabaceae
Famiho classico : Leguminosae

Ordre : Fabales

Coulour de la flour : Jauno
Petalo : irreguliero
Ø (o loungour) flour : 6 à 8 mm
Flourido : Printèms - Estiéu

Sòu : Ca
Autour basso e auto : 0 à 600 m
Aparado : Noun

Liò : Champ - Camin - Ermas
Estànci : Termoumediterran à Subremediterran
Couroulougi : Estenomediterrano
Ref. sc. : Trigonella esculenta Willd., 1809

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.